Azerbaycanda uquq qoruyıcılar Rusiye vatandaşlarını teşkere. Bu aqta «Kovçeg» rusiyelilerge yardım leyhası ve Rusiyeniñ Baku elçihanesi haber eteler.
«Kovçeg» malümatına köre, Azerbaycanda yaşağan rusiyeliler olarğa muracaat ete. Olar mesken evlerde ve bulunğan yerlerde gece reydleri aqqında bildirdi.
Rusiyeniñ Azerbaycan elçihanesi diplomatik missiyağa «Azerbaycan Cumhuriyetinde şu cümleden turizm maqsadınen bulunğan Rusiye Federatsiyasınıñ vatandaşlarından muracaatlar keldi», dep bildirdi.
«Olar yaşağan yerlerine adiy urbada (bazıları özüni polis hadimleri olaraq tanıttı) insanlar kelgenini haber etti, olar rusiyelilerniñ memlekette bulunuv maqsadlarını sorap, vesiqalarını teşkerdiler. Muracaat etken bazılarınıñ aytqanına köre, olarğa ve qoranta azalarına qarşı küç qullanıldı», – dep bildire Rusiye elçihanesi.
Muarririyet bu malümatnı mustaqil şekilde teşkerip olamay.
Azerbaycan ve Rusiye arasında munasebetler iyünniñ 27-nde Yekaterinburgda 50 Azerbaycan vatandaşı tutulğan soñ bozuldı. Tutulğan eki kişi can berdi. Rusiye yürek yetmezligi sebebinden vefat etkenlerini bildire. Baku versiyasına köre, azerbaycanlılarnıñ ölüm sebebi tutulğanda alğan yaraları oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.