13 yılğa üküm etilgen Arsen Abhairov Rusiyeniñ Novoçeboksarsk şeerine etap etilgen soñ tiş problemleri ve varikoz daa beter oldı. Bu aqta «Qırım birdemligi» apayı Azize Abhairovanıñ malümatına esaslanıp haber ete.
Onıñ aytqanına köre, aqayınıñ varikozı acele tüzetilmeli. Qırımtatarı 2023 senesi mayıs ayından berli varikoznı almaq içün ameliyat yapılmalı, dep ayta.
«Raatsızlağan varikoz beter oldı. Ve, ebet, [koloniyada] kerekli tedaviylev yoq. Bulunğan şaraitlerinde kerekli tiş tedaviylevini keçirmek de imkânsız», – dep tarif etti Azize Abhairova.
2019 senesi kiçik ayda Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi boş aynıñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.