İyülniñ 2-nde kündüz Qırım dronlarnıñ ücümine oğradı, dep bildire Rusiye Mudafaa nazirliginiñ matbuat hızmeti içtimaiy ağlardaki saifelerinde.
Müessise Rusiye Federatsiyasınıñ Ava mudafaa quvetleri yarımadada dört dronnı urıp tüşürgen, dep bildirdi, lâkin sözleri tasdıqlanmadı ve tafsilâtlar berilmedi.
«Krımskiy veter» Telegram kanalı yerli sakinlerniñ malümatına esaslanıp, yerli vaqıtnen saat 10:20-de Qırımnıñ Canköy rayonında patlav eşitildi, saat 10:59 Canköy tarafından ava mudafaa sistemasınıñ iş sesleri eşitildi. Bundan evel Rusiye monitoring kanalları Qırımnıñ şimalinde beklenilgen uçucısızlar sebebinden telüke aqqında yazdı.
İyünniñ 30-ndan iyülniñ 1-ne keçer gecesi Rusiye akimiyeti Keriç köpründe ve Aqyar körfezi reydinde areketni qapatqan edi. Yerli Telegram kanallarında aqşam ve gece Qırımğa raketa ve uçucısızlarnıñ ücümi aqqında haberler peyda oldı, ava telükesi de ilân etildi. Rusiye Mudafaa nazirligi Qırımğa ücümni tasdıqlap, yarımadada 17 ve Azaq deñizinde 11 uçucısıznıñ yoq etilüvi aqqında bildirdi. Darbe ya da zararlar aqqında haber etilmey.
İyünniñ 28-ne keçer gecesi Ukrayina Telükesizlik hızmetiniñ dronları Qırımnıñ şarqında «Kirovskoye» Rusiye uçaq alanına ücüm etti. Berilgen malümatqa köre, ücüm neticesinde Mi-8, Mi-26 ve Mi-28 ve ZRPK «Pantsir-S1» yoq etildi.
İyulniñ 1-nde Ukrayina Mudafaa nazirliginiñ Baş istihbarat idaresi işğal etilgen Saqta Rusiye arbiy tehnikası yoq etildi, dep bildirdi. Qayd etilgenine köre, «Bober» dronları ZRPK «Pantsir-S1» RLS «Niobiy-SV», yalıdaki RLS «Peçora-3», RLS «Protivnik-GE» ve Saqtakii arbiy uçaq alanında Su-30 Rusiye qırıcısına ücüm etti. Ücüm ne vaqıt oldı – qayd etilmey. İyünniñ 13-nde yarımadanıñ bir qaç şeerinde, Saqta da patlavlar aqqında haber etilgen edi.
2022 senesinden başlap yarımadağa aman-aman er kün dronlar ve raketalar ücüm ete; ekseriy allarda Rusiyeniñ Mudafaa Nazirligi ya da Rusiye akimiyeti bu malümatnı tasdıqlamaq mümkün olsa da, arbiy nişanlarğa darbe endirilgenini tasdıqlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
